Kuhusu Sisi

Tume inaundwa na Mwenyekiti na Makamishna wawili ambao wanateuliwa na Rais wa Zanzibar kwa mujibu wa kifungu cha 5 na 6 cha Sheria ya Tume ya Maadili ya Viongozi wa Umma. Mwenyekiti na Makamishna wanatumikia nafasi zao kwa kipindi cha miaka mitano na wanaweza kuteuliwa tena kwa kipindi chengine.

Kwa mujibu wa vifungu namba 12, 13 na 37 vya Sheria ya Maadili ya Viongozi wa Umma , kazi na majukumu ya Tume ni pamoja na:

• Kupokea na kuhifadhi Tamko la Taarifa za Mali na Madeni linalowasilishwa na Kiongozi wa Umma kwa mujibu wa Sheria ya Maadili ya Viongozi wa Umma;
• Kupokea tuhuma na taarifa za uvunjwaji wa maadili kutoka kwa wananchi;
• Kufanya uchunguzi juu ya madai au tuhuma za uvunjwaji wa maadili dhidi ya Kiongozi yeyote wa Umma;
• Kupokea, kuchunguza na kushughulikia madai yote yanayohusu uvunjwaji wa maadili katika taasisi za umma;
• Kuchunguza mwenendo wa Kiongozi yeyote wa Umma ambao kwa maoni ya Tume, unapelekea au unachangia uvunjwaji wa maadili chini ya Sheria ya Maadili ya Viongozi wa Umma;
• Kusikiliza na kutoa maamuzi kuhusu madai yoyote ya uvunjwaji wa maadili dhidi ya Kiongozi wa Umma; na
• Kuelimisha umma juu ya umuhimu wa maadili.

Uwezo wa Tume:

• Kumuagiza ofisa yeyote wa Tume kufanya uchunguzi wa tuhuma yoyote ya uvunjwaji wa Sheria ya Maadili ya Viongozi wa Umma, Sheria Nam. 4 ya mwaka 2015;
• Kumtaka kwa maandishi, mtu yeyote au taasisi yoyote kutoa au kuwasilisha taarifa au kujibu maswali au kuwasilisha kumbukumbu au nyaraka zozote zinazohusiana na tuhuma zinazohitaji kufanyiwa uchunguzi; na
• Kuchunguza Akaunti yoyote ya Benki ambayo Tume inataka kujiridhisha kuhusu hesabu zake, hesabu za hisa, hesabu za manunuzi au nyaraka zozote zinazohusiana na akiba au amana.

Kwa mujibu wa kifungu cha 7 cha Sheria, Mtu atakayeteuliwa kuwa Mwenyekiti ni lazima awe ni Mzanzibari mwenye sifa za kuwa Jaji wa Mahkama Kuu, mwenye heshima, ueledi, uaminifu, uadilifu na asiye na tabia au mwenendo wenye kutiliwa shaka. Aidha Makamishna nao wanatakiwa wawe ni wazanzibari wenye sifa za ueledi, uzoefu na uaminifu.

Mtu hatofaa kuteuliwa kuwa Mwenyekiti ikiwa:-

1. ni mjumbe wa Baraza la Wawakilishi au Mbunge.
2. (b) ni mtu aliyetangazwa kuwa amefilisika.
3. ni mtu aliyetiwa hatiani na Mahakama au chombo chengine chochote cha kinidhamu kwa makosa ya uadilifu au uaminifu.